ਕਿਸ ਸਾਦਗੀ ਦੇ ਨਾਲ਼ ਦੇਖੋ ਉਹ ਛਲ ਰਹੇ ਨੇ
ਕਿਤੇ ਹੋਰ ਜਾ ਰਹੇ ਨੇ ਮੇਰੇ ਨਾਲ਼ ਚਲ ਰਹੇ ਨੇ
ਸ਼ਾਇਦ ਸਜ਼ਾ ਕੋਈ ਬਾਕੀ ਅਜੇ ਹੋਰ ਰਹਿ ਗਈ ਹੈ
ਹੁਣ ਫੇਰ ਦੋਸਤੀ ਦਾ ਪੈਗ਼ਾਮ ਘਲ ਰਹੇ ਨੇ
ਸੁਖ ਸਾਂਦ ਇਕ ਦੂਏ ਦੀ ਪੁਛਦੇ ਹਾਂ ਇਸ ਤਰ੍ਹਾਂ ਹੁਣ
ਹਾਲਾਤ ਕਿਸ ਤਰ੍ਹਾਂ ਦੇ ਤੇਰੇ ਸ਼ਹਿਰ ਚਲ ਰਹੇ ਨੇ
ਹੈ ਅਜਬ ਦਿਲਕਸ਼ੀ ਇਹ ਅਜਕਲ੍ਹ ਮਹੌਲ ਅੰਦਰ
ਨ੍ਹੇਰੀ ਵੀ ਚਲ ਰਹੀ ਹੈ ਦੀਵੇ ਵੀ ਬਲ਼ ਰਹੇ ਨੇ
ਆਖੋ ਮੁਸਾਫ਼ਰਾਂ ਨੂੰ ਹੁਣ ਹੌਸਲਾ ਨਾ ਹਾਰਨ
ਥੋੜ੍ਹੀ ਹੀ ਦੇਰ ਧੁਪ ਹੈ ਪਰਛਾਵੇਂ ਢਲ਼ ਰਹੇ ਨੇ
ਮੇਰੀ ਕਾਮਯਾਬੀ ਉਤੇ ਜੋ ਦੇ ਰਹੇ ਮੁਬਾਰਕ
ਬਾਹਰੋਂ ਤਾਂ ਖੁਸ਼ ਬੜੇ ਨੇ ਅੰਦਰੋਂ ਕਈ ਜਲ਼ ਰਹੇ ਨੇ
ਸਾਹਿਤਕ ਇੰਟਰਨੈੱਟ ਮੈਗਜ਼ੀਨ "ਸ਼ਬਦ ਸਾਂਝ" 'ਤੇ ਆਪਜੀ ਦਾ ਨਿੱਘਾ ਸਵਾਗਤ ਹੈ । ਪੰਜਾਬੀ ਸਾਹਿਤ ਦੇ ਵਿਕਾਸ ਤੇ ਪ੍ਰਸਾਰ ਲਈ ਇਹ ਇੱਕ ਨਿਮਾਣਾ ਜਿਹਾ ਉੱਦਮ ਹੈ । "ਸ਼ਬਦ ਸਾਂਝ" ਦਾ ਕਿਸੇ ਵੀ ਰਾਜਨੀਤਿਕ, ਵਪਾਰਿਕ ਜਾਂ ਧਾਰਮਿਕ ਸੰਸਥਾ ਨਾਲ ਕੋਈ ਸਿੱਧਾ ਜਾਂ ਅਸਿੱਧਾ ਸੰਬੰਧ ਨਹੀਂ ਹੈ । ਆਪ ਜੀ ਦੇ ਹੁੰਗਾਰੇ ਦੀ ਭਰਪੂਰ ਆਸ ਰਹੇਗੀ ।